Þegar Uppsprettan eftir Ayn Rand kom út á íslensku 28. nóvember 2011, hélt dr. Tom Palmer frá Cato Institute í Washington DC erindi í Þjóðmenningarhúsinu um „einstaklingshyggju 21. aldar“. Þar ræddi hann um boðskap Ayns Rands í skáldsögum hennar og kapítalisma og sósíalisma í ljósi reynslunnar. Um kvöldið var Palmer aðalræðimaður í frelsiskvöldverði að Þingholti á Hótel Holti. Viðskiptablaðið ræddi við Palmer 1. desember.

Þegar Svartbók kommúnismans kom út í íslenskri þýðingu og ritstjórn Hannesar H. Gissurarsonar prófessors 31. ágúst 2009, hélt sænski Evrópuþingmaðurinn Göran Lindblad erindi í Þjóðminjasafninu. Þar sagði hann frá ályktunum Evrópuráðsins frá 2006 og Evrópuþingsins frá 2009 um, að kommúnisminn væri ekki síður glæpsamlegur í eðli sínu en nasisminn og að minnast yrði fórnarlamba kommúnista. Björn Bjarnason, fyrrverandi dómsmálaráðherra, var fundarstjóri. Jón Baldvin Hannibalsson, fyrrverandi utanríkisráðherra, brást við erindi Lindblads. Urðu nokkrar umræður á Netinu eftir það um, hvort kúgun væri eðlislæg í kenningu Marx, eins og dr. Arnór Hannibalsson heimspekiprófessor (og bróðir Jóns Baldvins) hélt fram, en Jón Baldvin vísaði á bug.