Myndasýning sú, sem RNH stóð að 23. ágúst til 16. september 2013 í samstarfi við Þjóðarbókhlöðuna og Alþjóðamálastofnun Háskóla Íslands, „Heimskommúnisminn og Ísland,“ hefur vakið mikla athygli. Sjónvarpið sagði frá henni í kvöldfréttum 23. ágúst og ræddi einnig við dr. Mart Nutt, þingmann frá Eistlandi, sem flutti fyrirlestur við opnunina. Viðskiptablaðið sagði frá myndasýningunni 23. ágúst á vefsjónvarpi sínu og ræddi við Dr. Pawel Ukielski, forstöðumann safnsins um uppreisnina í Varsjá 1944, en hann flutti fyrirlestur við opnunina. Viðskiptablaðið birti einnig frétt um myndasýninguna og nokkrar myndir af henni 29. ágúst. Morgunblaðið birti frétt um myndasýninguna 24. ágúst og viðtal við dr. Pawel Ukielski 9. september,  og talaði hann þar um bandalag nasista og kommúnista tvö fyrstu ár heimsstyrjaldarinnar síðari, uppreisnina í Varsjá 1944, safnið um uppreisnina, sem hann veitir forstöðu, og kynni sín af Lech Kaczynski, forseta Póllands, sem var áhugasamur um að halda á lofti minningunni um fórnarlömb alræðisstefnunnar. Morgunblaðið birti einnig ritstjórnargrein 24. ágúst í tilefni minningardagsins um fórnarlömbin. Á Youtube er stutt heimildarmynd frá RNH með boðskap þeirra Nutts og Ukielskis ásamt nokkrum sýnishornum frá myndasýningunni.

Fundur Íslensks þjóðráðs og RNH 30. ágúst 2013 með Mörtu Andreasen, fyrrverandi yfirmanni reikningshalds framkvæmdastjórnar Evrópusambandsins, vakti einnig mikla athygli. Sjónvarpið ræddi við hana í kvöldfréttum 30. ágúst. Morgunblaðið birti viðtal við Andreasen 31. ágúst og erindi hennar í heild 3. september. Þar sagði hún meðal annars um reynslu sína í starfi: „Ég varð furðu lostin á skorti á gagnsæi og eftirliti með eyðslu á skattfé almennings en þó enn meir á staðföstum ásetningi kerfiskarla um að koma í veg fyrir umbætur.“ Einnig birti blaðið ritstjórnargrein um boðskap Andreasens 2. september. Upptaka af fyrirlestri Andreasens var sýnd nokkrum sinnum í sjónvarpsstöðinni ÍNN, og einnig má nálgast hana á heimasíðu Íslensks þjóðráðs, á Youtube og hér:

Frá v.: Hallur Hallsson, Björn Bjarnason og Marta Andreasen. Ljósm. Octavio Otaño.

Marta Andreasen, fyrrverandi yfirbókari framkvæmdastjórnar Evrópusambandsins, ESB, var ómyrk í máli á fjölsóttum fundi RNH, Íslensks þjóðráðs og annarra samtaka um framtíð Evrópusambandsins föstudaginn 30. ágúst 2013: Gangið ekki í ESB! Andreasen var rekin fyrir að gera athugasemdir við spillingu og óreiðu innan ESB og neita að skrifa upp á reikninga þess. Hún benti á, að reikningar ESB hefðu ekki fengist endurskoðaðir í átján ár. Endurskoðendur treystu sér ekki til þess að staðfesta þá um undirskrift sinni. Hún spurði, hvert allt hið mikla fé, sem Grikkjum og Spánverjum hefði verið veitt eftir aðild sína til að laga hagkerfi sín að öðrum evrópskum hagkerfum, hefði runnið. Í ljós hefði komið í fjármálakreppunni 2008, að þessi hagkerfi hefðu verið alls vanbúin. Andreasen kvaðst geta borið um það af reynslu sinni sem einn af æðstu embættismönnum ESB, að sambandinu væri stjórnað af slíkum embættismönnum, en ekki kjörnum fulltrúum fólksins, enda hefðu kjósendur í Evrópulöndum margsinnis greitt atkvæði gegn tillögum ESB um stjórnarskrár, nýja sáttmála eða upptöku evru, þegar þeir hefðu átt kost á því.

Embættismennirnir nafnlausu og ábyrgðarlausu í Brüssel vildu gjarnan, sagði Andreasen, að Ísland fengi aðild að ESB, því að þeir vildu víkka sambandið út og auka völd sín sem mest, en þeir hefðu líka augastað á hinum fengsælu fiskimiðum umhverfis Ísland. Ólíklegt væri, ef Íslendingar fengju aðild að ESB, að ýmsar Evrópuþjóðir með stóra fiskiskipaflota myndu þá leyfa Íslendingum að sitja einum að þeim, þegar til lengdar læti. Andreasen situr nú á Evrópuþinginu fyrir breska Íhaldsflokkinn. Hún kvað þingið hins vegar vera lítið annað en gúmmístimpil fyrir embættismennina í Brüssel. Evrópuráðið væri eina stofnunin, sem reyndi að halda valdi í skefjum. Bretland hefði líka gegnt mikilvægu hlutverki við að hægja á og jafnvel snúa við hinum öra vexti Brüssel-valdsins. Andreasen hefur skrifað bók um veldi skriffinnanna í Brüssel, Brussels Laid Bare eða Brüssel-valdið afhjúpað. Koma Andreasens til landsins vakti mikla athygli, og fluttu Sjónvarpið og Morgunblaðið viðtöl við hana. Talsvert hefur líka verið skrifað á Netinu um sjónarmið Andreasens, til dæmis Björn Bjarnason í leiðara Evrópuvaktarinnar og Evrópusambandsaðildarsinninn Elvar Örn Arason á Eyjubloggi sínu, þar sem hann svaraði að vísu ekki rökum Andreasens, heldur rifjaði upp vandræðalegar staðreyndir um fyrrverandi samstarfsfólk hennar, og svaraði Björn Bjarnason honum að bragði.

Hinum skrifaða fyrirlestri Andreasens má hlaða niður héðan. Þátttaka RNH í þessum viðburði var liður í samstarfsverkefni RNH og AECR, „Evrópa, Ísland og framtíð kapítalismans“.

Frá v.: Ukielski, Nutt og Gissurarson. Ljósm.: Ólafur Engilbertsson.

Opnuð var mynda- og bókasýning á Þjóðarbókhlöðunni, sem RNH stendur ásamt öðrum að, 23. ágúst 2013, en Evrópuþingið hefur valið þann dag minningardag um fórnarlömb alræðis í Evrópu, nasisma og kommúnisma: Hitler og Stalín gerðu þann dag 1939 griðasáttmálann, sem hleypti af stað heimsstyrjöldinni síðari. Sýningin nefnist „Heimskommúnisminn og Íslandi“. Dr. Hannes H. Gissurarson prófessor valdi myndir og bækur og samdi skýringartexta, en Ólafur Engilbertsson hjá Sögumiðlun ehf. sá um hönnun.

Við opnunina fluttu tveir gestir frá Mið- og Austur-Evrópu fyrirlestra. Dr. Mart Nutt sagði frá Eistlandi, smáþjóð undir oki erlends valds, sem  kynntist í senn harðneskju og rússneskjun, og dr. Pawel Ukielski lýsti uppreisninni í Varsjá 1944, sem nasistar börðu niður af mikilli grimmd, á meðan Stalín beið átekta hinum megin við fljótið Vislu, sem rennur í gegnum borgina. Fylgdust áhorfendur agndofa með mörgum myndunum, sem birtust á skjánum.

Í viðtali við Viðskiptablaðið benti Ukielski á, að heimsstyrjöldin síðari hefði ekki aðeins verið stríð Vesturveldanna og nasista. Fyrstu tvö árin voru Hitler og Stalín bandamenn, þótt Stalín tæki ekki þátt í styrjöldinni. Með griðasáttmálanum höfðu þeir skipt á milli sín Mið- og Austur-Evrópu. Alræðisherrarnir urðu ekki óvinir, fyrr en Hitler réðst á Stalín í júní 1941.

Í viðtali við Sjónvarpið, sem flutt var að kvöldi 23. ágúst ásamt svipmyndum af sýningunni, rifjaði Nutt upp, að hann hefði tekið þátt í  „Eystrasaltskeðjunni“ 23. ágúst 1989. Þá tóku á þriðju milljón manna höndum saman og mynduðu lifandi keðju, sem náði frá Tallinn í Eistlandi til Vilnius í Litháen. Kröfðust þátttakendur sjálfstæðis og frelsis Eystrasaltsþjóðanna. Í viðtali við Morgunblaðið þakkaði Nutt Íslendingum þann hlýhug, sem þeir hefðu sýnt Eystrasaltsþjóðunum. Eftir opnunina gekk Nutt á fund Davíðs Oddssonar, fyrrverandi forsætisráðherra, og færði honum sérstakt merki Eistlands til að minnast þess, að fjörutíu ár eru frá því, að Davíð, sem þá var ungur laganemi, þýddi bókina Eistland. Smáþjóð undir oki erlends valds eftir eistnesk-sænska rithöfundinn Andres Küng. Davíð var síðan forsætisráðherra sumarið 1991, þegar Ísland varð fyrst ríkja til að endurnýja viðurkenningu sína á sjálfstæði Eystrasaltsríkjanna.

Fjölmenni var á fyrirlestrinum, þar á meðal pólski sendiherrann á Íslandi, ýmsir fyrrverandir ráðherrar, háskólaprófessorar, gamlir og tryggir Varðbergsfélagar og einnig nokkrir úr hinum fjölmenna hópi Pólverja á Íslandi. Dr. Hannes H. Gissurarson prófessor var fundarstjóri, en eftir fyrirlestrana báru þeir dr. Ásgeir Jónsson hagfræðingur, Guðlaugur Þór Þórðarson alþingismaður og dr. Einar Stefánsson prófessor fram fyrirspurnir, sem Nutt og Ukielski svöruðu. Síðan skoðuðu fundargestir sýninguna og þáðu loks veitingar í anddyri Þjóðarbókhlöðunnar. Einn þeirra, dr. Benedikt Jóhannesson, stærðfræðingur og útgefandi, bloggaði síðan um fundinn og sýninguna. Viðskiptablaðið birti nokkrar myndir af fundinum og úr ljósmyndasýningunni 29. ágúst. Auk RNH stóðu að atburðinum Þjóðarbókhlaðan, Alþjóðamálastofnun Háskóla Íslands og Varðberg, samtök um vestræna samvinnu og alþjóðamál.

Komin er á Youtube stutt fréttamynd, klippt upp úr viðtölum við Ukielski og Nutt:

Glærur Ukielskis

Glærur Nutts